गृहमन्त्री गुरुङ भारत भ्रमणमा, कहाँ के गर्ने तयारी ?

काठमाडौं । गृहमन्त्री सुधन गुरुङ भारत भ्रमणमा गएका छन् । बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) को प्रथम गृहमन्त्रीस्तरीय बैठकमा सहभागी हुन उनी आज दिउँसो १ बजे भारत गएका हुन् ।  गृहमन्त्रीको कार्यभार सम्हालेयता उनको यो पहिलो औपचारिक वैदेशिक भ्रमण हो।

कहाँ के गर्ने तयारी ?
भारतको नयाँ दिल्लीमा मंगलबार आयोजना हुने बिमस्टेक गृहमन्त्रीस्तरीय बैठकलाई गृहमन्त्री सुधन गुरुङले सम्बोधन गर्ने कार्यक्रम छ।

सन् २०१८ मा काठमाडौँमा सम्पन्न चौथो बिमस्टेक शिखर सम्मेलनले सुरक्षा क्षेत्रको उच्चस्तरीय संयन्त्रको रूपमा यो बैठकको परिकल्पना गरेको थियो। सोही परिकल्पनाअनुसार पहिलोपटक भारतमा यो बैठक आयोजना हुन लागेको हो। बैठकमा बिमस्टेक सदस्य मुलुकका आन्तरिक सुरक्षा मामिला हेर्ने मन्त्रीहरूको सहभागिता रहनेछ।

बैठकमा बिमस्टेक क्षेत्रमा देखा परेका लागुपदार्थ ओसारपसार, मानव बेचबिखन, सम्पत्ति शुद्धीकरण, आतङ्कवादी क्रियाकलापमा वित्तीय लगानी, आतङ्कवाद, विपद्जन्य सुरक्षा तथा साईबर अपराधजस्ता अन्तरदेशीय एवं क्षेत्रीय सुरक्षा चासोका विषयमा सहकार्य प्रवर्द्धन गर्न गहन छलफल हुनेछ। सो क्रममा सुरक्षा क्षेत्रका बिमस्टेकस्तरीय विभिन्न संयन्त्रमा भएका छलफल र दस्तावेजहरू पारित गर्दै संयुक्त घोषणापत्रसमेत जारी गरिनेछ।

बैठकमा नेपालका तर्फबाट जलवायु परिवर्तनका कारण हिमाली क्षेत्रमा बढ्दो प्राकृतिक विपद्को जोखिम न्यूनीकरण, पूर्वसूचना प्रणालीको सुदृढीकरण तथा एकीकृत उद्धार र राहतका लागि क्षेत्रीय सहकार्य बढाउने विषयलाई विशेष प्राथमिकताका साथ उठाइनेछ।

बिमस्टेक सदस्य मुलुकमध्ये सबैभन्दा कम उमेरका गृहमन्त्रीका रूपमा रहेका गुरुङले भ्रमणका क्रममा आफ्ना समकक्षीहरूसँग द्विपक्षीय वार्ता गर्नेसमेत कार्यसूची रहेको छ।

तीन दिने भारत भ्रमण पूरा गरी गृहमन्त्री गुरुङ असोज २८ गते बुधबार स्वदेश फर्कने कार्यक्रम रहेको छ।